प्रदीप दास ,रौतहट ।
चैत्र १८ गते ,बुधबार ।
रौतहट जिल्लाको कटहरिया बजारमा रहेको विवाह मण्डपको सभा हलमा आज एक दिवसीय निशुल्क आँखा शिविर सफलतापूर्वक सम्पन्न भएको छ।
शिविरको प्रमुख अतिथि कटहरिया नगरपालिकाका नगर प्रमुख अजय प्रकाश जैसवाल रहनुभएको थियो। कार्यक्रममा नगर प्रमुख जैसवालले शिविर सञ्चालनमा संलग्न सम्पूर्ण चिकित्सक तथा स्वास्थ्यकर्मीहरुलाई माला, टीका तथा दोसल्ला ओढाएर सम्मान गर्नुभएको थियो।
स्थानीय विकास केन्द्र, कटहरिया–२ को आयोजनामा तथा कटहरिया नगरपालिकाको सहयोगमा सञ्चालन गरिएको उक्त शिविरमा रोटरी क्लब अफ हेटौडाले प्राविधिक सहयोग प्रदान गरेको थियो।
शिविरमा जम्मा १३५ जनाको आँखा परीक्षण गरिएकोमा ७० जना मोतियाबिन्दुका बिरामी पहिचान भएका छन्। पहिचान भएका बिरामीहरुको आगामी शुक्रबार तिलगंगा सामुदायिक आँखा अस्पताल, हेटौडामा निशुल्क शल्यक्रिया गरिने आयोजकले जानकारी दिएको छ।
यसका साथै शल्यक्रियाका लागि जाने बिरामीहरुलाई आवतजावत खर्च, औषधि, चस्मा तथा खाना–खाजा समेत निशुल्क उपलब्ध गराइने बताइएको छ।
कार्यक्रममा नगर प्रमुख जैसवालले आगामी दिनमा पनि यस्ता जनमुखी तथा सेवामूलक कार्यक्रमलाई निरन्तरता दिने प्रतिबद्धता व्यक्त गर्नुभएको थियो।
