प्रदीप सम्राट , रौतहट ।
चैत २६ गते , बिहीबार ।
रौतहट जिल्लाको वृन्दावन नगरपालिका मा कर्मचारी अनुशासन सुदृढ गर्ने उद्देश्यले विशेष अभियान सुरु गरिएको छ। नगर प्रमुख विनोद प्रसाद कुर्मी को नेतृत्वमा गरिएको अनुगमनपछि कार्यालय समयको कडाइका साथ पालना गराउन स्पष्ट निर्देशन जारी गरिएको हो।
नगर प्रमुख कुर्मीको नेतृत्वमा सम्पन्न अनुगमनमा वडा नं. ६ का वडाध्यक्ष मजहर मन्सुर, वडा नं. ७ का अध्यक्ष जगरनाथ प्रसाद भेडियर, वडा नं. ८ का अध्यक्ष रवीन्द्र प्रसाद साह तथा शिलादीप अनलाइन खबर प्रा.लि. का सञ्चालक प्रदीप कुमार दास लगायतको सहभागिता रहेको थियो। संयुक्त टोलीले नगरपालिका कार्यालयका विभिन्न शाखा तथा सेवा केन्द्रहरूको अवस्थाबारे प्रत्यक्ष अवलोकन गरेको थियो।
अनुगमनका क्रममा नगर प्रमुख कुर्मीले सबै शाखा प्रमुख, स्थायी तथा करार सेवामा कार्यरत कर्मचारीहरूलाई बिहान ९ बजेदेखि बेलुका ५ बजेसम्म अनिवार्य रूपमा कार्यालयमा उपस्थित भई सेवाग्राहीलाई सेवा प्रदान गर्न निर्देशन दिएका छन्। उनले कार्यालय समयको पूर्ण पालना नगर्ने प्रवृत्ति नियन्त्रण गर्न कडा निगरानी गरिने चेतावनी समेत दिएका छन्।
कर्मचारीहरूले अत्यावश्यक वा आपतकालीन बाहेक अन्य अवस्थामा कार्यालय समयमै ड्युटीमा उपस्थित रहनुपर्ने व्यवस्था गरिएको छ। विदा लिनु परे अनिवार्य रूपमा लिखित निवेदन पेश गरी स्वीकृति लिएपछि मात्र कार्यालयबाट अनुपस्थित हुन पाइने व्यवस्था लागू गरिएको छ। यस्तै, आकस्मिक घटना वा विशेष परिस्थितिमा कार्यालय बाहिर जानुपर्ने भएमा प्रमुख प्रशासकीय अधिकृतलाई औपचारिक जानकारी गराएर मात्र बाहिरिनुपर्ने स्पष्ट निर्देशन दिइएको छ।
नगरपालिकाभित्र देखिएको ‘खाजा–नास्ता गर्ने बहाना’ मा बारम्बार बाहिरिने प्रवृत्तिलाई नियन्त्रण गर्न कार्यालय परिसरमै खाजा, चिया तथा पिउने पानीको व्यवस्था गरिएको नगर प्रमुख कुर्मीले जानकारी दिएका छन्। यस कदमले कर्मचारीलाई कार्यालयमै बस्दै सेवा प्रवाहमा केन्द्रित हुन सहयोग पुग्ने अपेक्षा गरिएको छ।
त्यसैगरी, सेवाग्राहीसँगको व्यवहारमा पनि सुधार ल्याउन विशेष जोड दिइएको छ। नगर प्रमुख कुर्मीले कर्मचारीहरूलाई सेवाग्राहीसँग शिष्ट, मर्यादित तथा सम्मानजनक ढंगले प्रस्तुत हुन निर्देशन दिँदै सार्वजनिक सेवामा सकारात्मक छवि निर्माण गर्न आग्रह गरेका छन्।
यसअघि नै प्रमुख प्रशासकीय अधिकृत श्याम किशोर प्रसाद ले गत चैत १७ गते लिखित निर्देशन जारी गर्दै नगरपालिका, वडा कार्यालय तथा स्वास्थ्य चौकीमा कार्यरत सम्पूर्ण कर्मचारीलाई समयमै उपस्थित भई नियमअनुसार कार्यसम्पादन गर्न निर्देशन दिइसकेको जानकारी दिएका छन्।
नगरपालिकाले सेवा प्रवाहलाई प्रभावकारी, पारदर्शी र जनमुखी बनाउन कर्मचारी अनुशासनलाई उच्च प्राथमिकतामा राख्दै यस्तो अभियान सञ्चालन गरिएको जनाएको छ।
