प्रदीप सम्राट, रौतहट ।
चैत २८ गते, शनिबार ।
रौतहटको गुजरा नगरपालिका–३ मा दीर्घकालीन रूपमा देखिँदै आएको ढल निकास समस्यालाई समाधान गर्ने लक्ष्यसहित नाला निर्माण कार्य तीव्र गतिमा अघि बढाइएको छ । वडा नम्बर ३ अन्तर्गत पर्ने बलुवा टोलमा सुरु गरिएको यस योजनाले स्थानीय बासिन्दामा नयाँ आशा जगाएको छ।
नगर प्रमुख सन्तलाल चौधरी र सक्रिय युवा समाजसेवी शेख सेराजको पहलमा करिब १८ लाख रुपैयाँको लागतमा दुई स्थानमा समान ७२/७२ मिटर लम्बाइका नाला निर्माण भइरहेका छन्। योजनालाई प्रभावकारी रूपमा कार्यान्वयन गर्न स्थानीय तह र समुदायबीच सहकार्यको उत्कृष्ट उदाहरण प्रस्तुत भएको छ।
विगत लामो समयदेखि यस क्षेत्रमा व्यवस्थित नाला नहुँदा वर्षायाममा सडकमा पानी जम्ने, हिलो तथा फोहोर फैलिने, दुर्गन्ध आउने र सरुवा रोगको जोखिम बढ्ने जस्ता समस्या स्थानीयले भोग्दै आएका थिए। विशेषगरी बालबालिका, वृद्धवृद्धा र सर्वसाधारणलाई आवतजावतमा कठिनाइ हुनुका साथै स्वास्थ्यसम्बन्धी चुनौती समेत थपिँदै आएको थियो।
यस्ता समस्यालाई मध्यनजर गर्दै युवा समाजसेवी शेख सेराजले स्थानीयको मागलाई प्राथमिकतामा राखी आवश्यक बजेट पालिकाद्वारा व्यवस्थापन गराई योजना अघि बढाएको बताएका छन्। उनले विकास निर्माणका काममा जनसहभागिता अपरिहार्य हुने उल्लेख गर्दै आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरे।
नाला निर्माण कार्यमा स्थानीय बासिन्दाको उल्लेखनीय साथ र सहयोग देखिएको छ। धेरैले आफ्नो घर, टहरा तथा संरचना हटाएर निर्माण कार्यलाई सहज बनाएका छन्। यसले समुदायमा विकासप्रति सकारात्मक सोच र एकताको भावना अझ मजबुत भएको देखिन्छ।
स्थानीयवासीहरूका अनुसार नाला निर्माण सम्पन्न भएपछि वर्षौंदेखि झेल्दै आएको जलनिकास समस्या समाधान हुने विश्वास लिइएको छ। “हामी सबै गाउँको विकासका लागि एकजुट भएका छौं, अहिले सुरु भएको कामले हामीमा खुशी मात्र होइन, भविष्यप्रति भरोसा पनि बढाएको छ,” एक स्थानीयले बताए।
