प्रदीप सम्राट, रौतहट ।
चैत २७ गते ,शुक्रबार ।
रौतहटको वृन्दावन नगरपालिका–स्थित बिश्रामपुर स्वास्थ्य चौकीमा कार्यरत कर्मचारीमाथि अभद्र व्यवहार भएको घटनाप्रति गम्भीर ध्यानाकर्षण भएको छ। बिहीबार सोही क्षेत्रका चार जना युवाहरूले मिलेर स्वास्थ्य चौकीमा कार्यरत कार्यालय सहयोगीमाथि कुटपिट गर्नुका साथै अन्य कर्मचारीहरूमाथि गालीगलौज र दुर्व्यवहार गरेको आरोप लागेको छ।
उक्त घटनापछि वृन्दावन नगरपालिकाका स्वास्थ्य संयोजक रास नारायण पटेलको अध्यक्षतामा आकस्मिक बैठक बसेको थियो। बैठकले घटनामा संलग्न व्यक्तिहरूलाई यथाशीघ्र पक्राउ गरी कानुनी कारबाही गर्न माग गर्दै बिश्रामपुर प्रहरी चौकीमा नामै किटानी गरी निवेदन दर्ता गराएको जनाएको छ।
स्वास्थ्य संयोजक पटेलले दोषीमाथि पाँच दिनभित्र कारबाही नभए कडा आन्दोलनमा उत्रने चेतावनी दिएका छन्। उनले नगरपालिकाभित्र रहेका सबै ९ वटै वडाका स्वास्थ्य संस्थाका कर्मचारीहरू एकजुट भई सेवा बन्द गरेर धर्ना बस्ने अवस्था आउन सक्ने बताएका छन्।
यस घटनाले स्वास्थ्य संस्थाको सुरक्षासम्बन्धी प्रश्न उठाएको भन्दै सरोकारवालाहरूले तत्काल निष्पक्ष छानबिन र दोषीमाथि कडा कारबाहीको माग गरेका छन्।
