चैत्र ६, काठमाडौं ।
राष्ट्रिय स्वतन्त्र पार्टी (रास्वपा) ले नयाँ सरकार गठनको तयारी तीव्र बनाएको छ। पार्टीभित्र शीर्ष तहका नेताहरूबीच छलफल गर्दै बालेन्द्र शाह को नेतृत्वमा सरकार गठन गर्ने रणनीति अघि बढाइएको हो।
निर्वाचन आयोग ले बिहीबार राष्ट्रपतिसमक्ष निर्वाचन परिणामको प्रतिवेदन बुझाएलगत्तै रास्वपाका प्रमुख नेताहरू सक्रिय बनेका हुन्। सोही दिन साँझ भएको उच्चस्तरीय छलफलमा १३ चैतमा शाहलाई प्रधानमन्त्री नियुक्त गराई शपथ गराउने समझदारी बनेको बताइएको छ।
छलफलमा पार्टी सभापति रवि लामिछाने, वरिष्ठ नेता शाह तथा उपसभापतिद्वय डीपी अर्याल र स्वर्णिम वाग्ले सहभागी थिए। उनीहरूबीच सोही दिन मन्त्रिपरिषद् गठन गर्ने सहमति भए पनि मन्त्रालयको संख्या र जिम्मेवारी बाँडफाँटबारे अन्तिम निर्णय भने हुन बाँकी रहेको एक नेताले जानकारी दिएका छन्।
रास्वपाले विधान संशोधन गर्दै शाहलाई संसदीय दलको नेता बनाउने तयारीसमेत अघि बढाएको छ। यसअघि नै पार्टीले उनलाई संसदीय दलको नेता तथा भावी प्रधानमन्त्रीका रूपमा अघि सार्ने घोषणा गरेको थियो।
निर्वाचनमा एकल बहुमत हासिल गरेपछि रास्वपाले आफ्नै नेतृत्वमा सरकार गठन गर्ने योजना बनाएको हो। सरकारमा अर्थ, गृह लगायतका महत्वपूर्ण मन्त्रालय कसलाई दिने भन्ने विषयमा अझै छलफल जारी छ। अर्थ मन्त्रालयमा वाग्ले, गृहमा अर्याल तथा परराष्ट्रमा शिशिर खनालको नाम चर्चामा रहेको स्रोतले जनाएको छ।
