प्रदीप सम्राट , रौतहट ।
चैत ०५ गते बिहिबार ।
गर्मी मौसम सुरु भएसँगै बृन्दावन नगरपालिकामा लामखुट्टेको प्रकोप बढ्न थालेपछि नियन्त्रणका लागि विषादी छर्ने अभियान सञ्चालन गरिने भएको छ। डेंगु र मलेरिया जस्ता जोखिमपूर्ण रोग फैलिन सक्ने सम्भावना बढेपछि नगरपालिका सक्रिय बनेको हो।
नगर प्रमुख बिनोद प्रसाद कुर्मीका अनुसार चैत १३ गतेदेखि नगरभित्रका ९ वटै वडामा चरणबद्ध रूपमा ‘एयर स्प्रे’ तथा पम्प स्प्रे गरिनेछ। बिहान र बेलुका तालिका अनुसार विषादी छर्ने व्यवस्था मिलाइएको छ भने लामखुट्टेको लार्भा नष्ट गर्ने विशेष अभियान पनि सँगसँगै सञ्चालन गरिनेछ।
मेशिन बिग्रिएका कारण केही ढिला भएको अभियानका लागि आवश्यक उपकरण र जनशक्ति तयारी अवस्थामा रहेको जनाइएको छ। अबको एक साताभित्र पूर्ण रूपमा अभियान सुरु हुने नगर प्रमुख कुर्मीले जानकारी दिए।
नगरपालिकाले अभियानलाई प्रभावकारी बनाउन वडास्तरमै योजना बनाएर काम अघि बढाउने जनाएको छ। साथै, नागरिकलाई घर वरिपरि सरसफाइ राख्न, पानी जम्न नदिन र फोहोर व्यवस्थापनमा ध्यान दिन आग्रह गरिएको छ।
