प्रदीप सम्राट, रौतहट
फाल्गुन १४ गते, बिहीबार
आगामी फाल्गुन २१ गते हुने प्रतिनिधिसभा निर्वाचनको मिति नजिकिँदै जाँदा रौतहट क्षेत्र नं. ४ मा चुनावी गतिविधि उल्लेखनीय रूपमा तीव्र बनेको छ। विशेषगरी वृन्दावन नगरपालिका क्षेत्रमा तारा छापका उम्मेदवारको घरदैलो अभियानले जनसागर उतारेको दृश्य देखिएको छ। टोल–टोलमा मतदाता भेटघाट, छलफल र अन्तरक्रियाले चुनावी माहोल झन् चहलपहलपूर्ण बनेको छ।
नेपाली कम्युनिष्ट पार्टीका तर्फबाट प्रतिनिधिसभा सदस्य पदका उम्मेदवार रामकुमार भट्टराई यतिबेला घरदैलो कार्यक्रमलाई तीव्रता दिँदै मतदातासँग प्रत्यक्ष संवादमा व्यस्त हुनुहुन्छ। बिहीबार वृन्दावन नगरपालिका–१, २ र ३ अन्तर्गत धनगढी, बलरीखोर र विश्रामपुर क्षेत्रमा आयोजित घरदैलो कार्यक्रममा स्थानीयवासीको उत्साहजनक उपस्थिति देखिएको थियो।
घरदैलो अभियानका क्रममा उम्मेदवार भट्टराईले प्रत्येक घरआँगनमा पुगेर मतदाताका गुनासा, सुझाव र अपेक्षा सुन्ने प्रयास गर्नुभएको थियो। उहाँले क्षेत्रको समग्र विकासका लागि स्पष्ट योजना र दीर्घकालीन दृष्टिकोण आवश्यक रहेको उल्लेख गर्दै आफू परिणाममुखी नेतृत्व दिन प्रतिबद्ध रहेको बताउनुभयो।
“राजनीति केवल नारामा सीमित हुनुहुँदैन, जनताको जीवनस्तर सुधार्ने काममै केन्द्रित हुनुपर्छ,” उहाँले भन्नुभयो, “पारदर्शी शासन प्रणाली, युवाका लागि रोजगारी सिर्जना, कृषि क्षेत्रको आधुनिकीकरण, गुणस्तरीय शिक्षा र सर्वसुलभ स्वास्थ्य सेवा मेरो प्राथमिकतामा छन्।”
स्थानीय बासिन्दासँगको अन्तरक्रियामा पूर्वाधार विकास, सडक स्तरोन्नति, सिँचाइ व्यवस्था, खानेपानी तथा शिक्षा–स्वास्थ्य सेवाको सुदृढीकरण जस्ता विषयहरू उठाइएको थियो। धेरै मतदाताले विगतका अपूरा प्रतिबद्धता दोहोरिन नदिन सक्षम र इमान्दार नेतृत्व आवश्यक रहेको धारणा राखेका थिए।
कार्यक्रमका क्रममा विभिन्न उमेर समूहका नागरिकहरूले फूलमाला र खादा ओढाएर उम्मेदवारलाई स्वागत गरेका थिए। युवा वर्गको उल्लेखनीय सहभागिताले अभियानमा थप ऊर्जा थपेको देखिन्थ्यो। महिला समूहहरूले समेत घरदैलो टोलीलाई स्वागत गर्दै सामाजिक सशक्तीकरण र स्वरोजगारका अवसर विस्तारमा जोड दिएका थिए।
रौतहट–४ मा चुनावी प्रतिस्पर्धा दिनप्रतिदिन रोचक बन्दै गइरहेको छ। उम्मेदवारहरू आफ्ना एजेन्डा र योजनासहित मतदाताको घरदैलोमा पुगिरहेका छन्। यस क्षेत्रका मतदाता पनि राजनीतिक रूपमा सचेत देखिएका छन्, जसले गर्दा प्रत्येक कार्यक्रम बहस र अन्तरक्रियामै केन्द्रित हुने गरेको छ।
वृन्दावन क्षेत्रमा तारा छापको घरदैलो अभियानले उल्लेखनीय जनसमर्थन जुटाएको दाबी गरिएको छ। आगामी फाल्गुन २१ गते हुने निर्वाचनले रौतहट–४ को भावी राजनीतिक दिशा तय गर्ने भएकाले यतिबेला सबै राजनीतिक शक्ति र समर्थकहरू जनमत आफ्नो पक्षमा पार्न सक्रिय रूपमा मैदानमा उत्रिएका छन्।
