प्रदीप सम्राट, रौतहट ।
फाल्गुन १३ गते, बुधबार ।
रौतहट क्षेत्र नम्बर–१ दुर्गा भगवती गाउँपालिका अन्तर्गत गंगा पिपरा भलोहियामा माधव कुमार नेपालको घरदैलो कार्यक्रम उत्साहपूर्वक सम्पन्न भएको छ। आगामी फाल्गुन २१ गते हुने निर्वाचनलाई लक्षित गर्दै आयोजना गरिएको उक्त कार्यक्रममा स्थानीय मतदाताको उल्लेखनीय सहभागिता देखिएको थियो।
घरदैलोका क्रममा नेता नेपालले टोलटोलमा पुगेर सर्वसाधारणसँग प्रत्यक्ष भेटघाट गर्दै उनीहरूको समस्या, सुझाव र अपेक्षाबारे चासो व्यक्त गर्नुभएको हो। स्थानीयवासीहरूले विकास, रोजगारी, शिक्षा र पूर्वाधार सुधारका विषयमा आफ्ना धारणा राखेका थिए।
यसैक्रममा दुर्गा भगवती गाउँपालिकाका नगर अध्यक्ष शम्भु सिंहको निजी निवासमा नेता नेपाललाई आत्मीय स्वागत गरिएको थियो। त्यहाँ आयोजित भेटघाट तथा छलफलमा समसामयिक राजनीतिक अवस्था, क्षेत्रीय विकासका सम्भावना र आगामी योजनाबारे संक्षिप्त संवाद भएको जनाइएको छ।
कार्यक्रममा विभिन्न तहका नेताकार्यकर्ताहरू, समर्थक तथा स्थानीय अगुवाहरूको सहभागिता रहेको थियो। गंगा पिपरा भलोहियामा सम्पन्न घरदैलो कार्यक्रमले चुनावी माहोललाई थप चलायमान बनाएको सहभागीहरूले बताएका छन्।
