प्रदीप सम्राट, रौतहट।
फाल्गुन ०९ गते , शनिबार ।
रौतहट क्षेत्र नं. ४ मा आगामी फाल्गुन २१ गते हुने प्रतिनिधिसभा निर्वाचन नजिकिँदै जाँदा चुनावी गतिविधि थप सक्रिय बन्दै गएको छ। यसै सन्दर्भमा रामजी साह ले आफ्नो चुनावी अभियानलाई तीव्रता दिँदै विभिन्न टोल–बस्तीमा मतदाता भेटघाट कार्यक्रम सञ्चालन गरिरहनुभएको छ।
नेपाल कम्युनिष्ट पार्टी (एमाले) का तर्फबाट उम्मेदवार बन्नुभएका साहले घरदैलो कार्यक्रममार्फत मतदातासँग प्रत्यक्ष संवादलाई प्राथमिकता दिनुभएको छ। शुक्रबार बृन्दावन नगरपालिका–४ अन्तर्गत हरैया र पल्टुवामा आयोजित कार्यक्रममा उहाँले स्थानीय बासिन्दासँग विकासका सम्भावना र क्षेत्रका आवश्यकता सम्बन्धी छलफल गर्नुभएको थियो।
भेटघाटका क्रममा उम्मेदवार साहले आफू नयाँ सोच र स्पष्ट योजनासहित मैदानमा उत्रिएको उल्लेख गर्दै पारदर्शी शासन, रोजगारी सिर्जना, गुणस्तरीय शिक्षा तथा सर्वसुलभ स्वास्थ्य सेवामा जोड दिने प्रतिबद्धता व्यक्त गर्नुभयो। “जनताको विश्वास जितेर परिणाममुखी काम गर्ने लक्ष्यसहित अघि बढेको छु,” उहाँको भनाइ थियो।
कार्यक्रममा स्थानीयवासीको उल्लेखनीय सहभागिता देखिएको थियो। विभिन्न उमेर समूहका मतदाताले फूलमाला र खादा ओढाएर स्वागत गरेका थिए। प्रत्यक्ष संवादमा धेरैले क्षेत्रको समग्र विकासका लागि सक्षम नेतृत्व आवश्यक रहेको धारणा राख्दै आगामी निर्वाचनमा सक्रिय सहभागिता जनाउने प्रतिबद्धता व्यक्त गरेका छन्।
चुनावी प्रतिस्पर्धा तीव्र बन्दै गइरहेको अवस्थामा रौतहट–४ मा मतदाताको सक्रियता र उम्मेदवारहरूको घरदैलो अभियानले माहोल झन् चहलपहलपूर्ण बनेको देखिन्छ। आगामी निर्वाचनले क्षेत्रको राजनीतिक दिशा निर्धारण गर्ने भएकाले सबै पक्ष यतिबेला जनसमर्थन जुटाउन केन्द्रित छन्।
