शिलादीप अनलाईन खबर,
असोज २८ गते, मंगलबार ।
रौतहट । लामो समयदेखि तलब–भत्ताबिना आन्दोलनमा रहेका फतुवा विजयपुर नगरपालिकाका शिक्षक, विद्यालय कर्मचारी, बालविकास सहजकर्ता र सहयोगीहरूको समस्या समाधानतर्फ सकारात्मक प्रगति भएको छ।
सोमबार एक औपचारिक कार्यक्रममा कार्यवाहक नगरप्रमुख अम्बेया खातुनले नगरपालिकाका लेखा प्रमुख कामेश्वर सहनीलाई आर्थिक अख्तियारी हस्तान्तरण गरेकी छिन्। यो फाइल हस्तान्तरणको कार्य शिक्षक आन्दोलनका अगुवा सुबोध प्रसाद यादवको रोहबरमा सम्पन्न भएको हो।
उक्त कार्यक्रममा कार्यवाहक नगरप्रमुख खातुनले प्रमुख प्रशासकीय अधिकृत भरत प्रसाद यादवलाई तिहार, दीपावली र छठजस्ता प्रमुख चाडपर्वअघि सबै आन्दोलनरत शिक्षक र कर्मचारीलाई तलब–भत्ता वितरण सुनिश्चित गर्न आवश्यक प्रक्रिया तुरुन्त अघि बढाउन निर्देशन दिएकी छिन् ।
गत असोज २४ गतेदेखि तलब–भत्ताको माग गर्दै निरन्तर आन्दोलनमा रहेका शिक्षक र कर्मचारीका मागप्रति नगरपालिकाले देखाएको तत्परताले समाधानको संकेत स्पष्ट भएको स्थानीयहरूले बताएका छन्। नगरपालिकाले आवश्यक प्रशासनिक र वित्तीय प्रक्रिया सुरु गरेसँगै अब शिक्षक तथा कर्मचारीहरूका लागि तलब–भत्ता वितरणको बाटो खुलेको जनाइएको छ।
शिक्षक आन्दोलनका अगुवा सुबोध प्रसाद यादवले नगरपालिकाको पहलप्रति आभार व्यक्त गर्दै भने, “कार्यवाहक नगरप्रमुखको निर्णयले हामी सबैलाई राहतको अनुभूति भएको छ। अब तिहार र छठ पर्व अघिसम्म तलब–भत्ता प्राप्त हुने सम्भावना प्रबल बनेको छ।”
यो निर्णयसँगै लामो समयदेखि असन्तुष्ट रहेका शिक्षक र कर्मचारीहरूमा उत्साह जागेको छ ।
