आर्यन पटेल, गरुडा ।
असोज १० गते, शुक्रबार।
दशैं–२०८२ को शुभ अवसरमा रेडियो मधेश मसला गरुडाको आयोजनामा स्व. मनोज कुमार चौधरी स्मृति म्याराथन दौड प्रतियोगिता आगामी असोज १२ गते सप्तमीका दिन हुने भएको छ।
प्रतियोगिता गरुडा नगरको ऐतिहासिक र धार्मिक महत्व बोकेको दुर्गा मन्दिर प्राङ्गणबाट सुरु भई नेपाल पुलिस स्कुल, जिगडिया हुँदै पुनः दुर्गा मन्दिरमै समापन गरिनेछ।
आयोजक संस्थाका अनुसार, दौडमा सहभागी हुन इच्छुक व्यक्ति कम्तीमा १६ वर्ष पूरा भई बढीमा ३५ वर्ष ननाघेका नेपाली नागरिक हुनुपर्नेछ। यस नियममार्फत युवाबीच स्वस्थ प्रतिस्पर्धा र अनुशासनलाई प्रोत्साहन गर्न खोजिएको जनाइएको छ।
कार्यक्रमको प्रमुख प्रायोजक गरुडा नगरपालिकाकी उपप्रमुख तथा स्व. चौधरीकी धर्मपत्नी पुनम कुमारी चौधरी रहेकी छन्। उनले खेलकुदलाई समाज परिवर्तनको प्रभावकारी माध्यम भन्दै, “दशैं जस्तो ठूलो चाँडमा युवालाई खेलमार्फत एकताबद्ध गर्नु महत्त्वपूर्ण हुन्छ,” भन्ने धारणा व्यक्त गर्नुभएको छ।
प्रतियोगितामा उत्कृष्ट प्रदर्शन गर्ने सहभागीहरूलाई आकर्षक पुरस्कारहरू प्रदान गरिनेछन्।
प्रथम हुनेले फ्रिज
द्वितीयले साइकल
तृतीयले राइस कुकर
चौथोले इलेक्ट्रिक जग
पुरस्कारस्वरूप प्राप्त गर्नेछन्। आयोजक समितिले पुरस्कारको आकर्षणसँगै खेलप्रति रुचि जगाउने उद्देश्य पनि रहेको स्पष्ट पारेको छ।
