प्रदीप सम्राट, रौतहट ।
असोज ०२ गते, बिहीबार ।
रौतहट जिल्लाको गरुडा नगरपालिकाका नगर प्रमुख कन्थमनी प्रसाद जैसवालले बिहीबार गरुडा नगरपालिका–४ स्थित वंशीराम जैसवाल अनाथालय परिसरमा निर्माण सम्पन्न भएको श्री अनाथालय आधारभूत विद्यालयको नवनिर्मित भवनको उद्घाटन गरेका छन् ।
संघीय सरकार र स्थानीय सरकारको साझेदारीमा करिब ५५ लाखभन्दा बढी लागतमा बनेको दुई कोठे सुविधा सम्पन्न अत्याधुनिक डिजाइनयुक्त भवनको उद्घाटनपछि विद्यालयले अब सुरक्षित र आधुनिक वातावरणमा शैक्षिक सेवा प्रदान गर्न सक्ने भएको छ ।
उद्घाटन समारोहमा नगर प्रमुख जैसवाल प्रमुख अतिथिको रूपमा उपस्थित हुनुहुन्थ्यो भने विद्यालय व्यवस्थापन समितिका अध्यक्ष सन्तोष कुमार चौधरी, प्रधानाध्यापक राजवंशी प्रसाद, विभिन्न वडाध्यक्ष तथा सदस्यहरू, राजनीतिक दलका नेताकार्यकर्ता, समाजसेवी तथा स्थानीय भद्रभलादमीहरूको उल्लेखनीय उपस्थिति रहेको थियो।
यसअघि विद्यालयका विद्यार्थीहरू वर्षौंदेखि जीर्ण र जर्जर भवनमा जोखिम मोलेर पढ्न बाध्य थिए। जुन भवन जुनसुकै बेला भत्किन सक्ने अवस्थामा पुगेको हुँदा विद्यार्थी तथा शिक्षकहरू निरन्तर त्रास र असुरक्षाबीच शिक्षण–अध्ययन गर्दै आएका थिए। तर अब नयाँ भवन निर्माण सम्पन्न भएपछि त्यस्तो बाध्यता अन्त्य भएको छ।
उद्घाटन कार्यक्रममा बोल्दै नगर प्रमुख जैसवालले शिक्षामा लगानीलाई नै दिगो विकासको आधार मान्दै नगरपालिकाले शैक्षिक पूर्वाधार निर्माणलाई निरन्तर प्राथमिकतामा राखेको बताउनुभयो। उहाँले भन्नुभयो, “अनाथ र विपन्न विद्यार्थीहरूलाई सुरक्षित वातावरणमा शिक्षा दिन पाउनु हाम्रो लागि ठूलो सन्तोषको कुरा हो। यस भवनले विद्यालय मात्र होइन, सम्पूर्ण समुदायलाई शिक्षा क्षेत्रमा आत्मविश्वास दिलाउनेछ।”
स्थानीय अभिभावक र समाजसेवीहरूले समेत नयाँ भवन बनेसँगै अब विद्यार्थीहरूले सजिलो, सुरक्षित र व्यवस्थित वातावरणमा पढ्न पाउने विश्वास व्यक्त गरेका छन्। विद्यालय व्यवस्थापन समितिका अध्यक्ष सन्तोष कुमार चौधरीले विद्यालयको शैक्षिक गुणस्तर उकास्न अबको चुनौती प्रभावकारी पठन–पाठन र दक्ष जनशक्ति व्यवस्थापन हुने बताउनुभयो।
