शिलादीप खबर न्युजडेस्क,
भदौ ०१ गते , बुधबार ।
सप्तकोशी नदीमा लगातार पानीको सतह बढ्दै गएपछि कोशी ब्यारेजका ५६ मध्ये २७ ढोका खोलिएको छ ।
जिल्ला प्रहरी कार्यालयका प्रवक्ता योगराज खतिवडाका अनुसार आज बिहान ११ बजे गरिएको मापनमा पानीको बहाव प्रति सेकेन्ड २ लाख ७ हजार ३० क्युसेक पुगेपछि ढोका थप खोलिएको हो । यसअघि मंगलबार राति १० बजे प्रवाह १ लाख ८२ हजार २८७ क्युसेक मात्र रहेकाले २४ ढोका मात्र खोलिएको थियो ।
गत भदौ १७ गते कोशीमा बहाव उच्च हुँदा ३८ ढोका खोल्नुपरेको थियो । त्यसपछि केही दिन बहाव घट्दो क्रममा रहे पनि बुधबार बिहानदेखि पुनः तीव्र गतिमा पानी बढ्न थालेको प्रवक्ता खतिवडाले जानकारी दिए ।
कोशी ब्यारेजमा पानीको बहाव १ लाख ५० हजार क्युसेक नाघेपछि खतराको संकेतस्वरूप रातो बत्ती बाल्ने व्यवस्था छ । सोहीअनुसार हाल ब्यारेजमा रातो बत्ती बलिरहेको कन्ट्रोल रुमले जनाएको छ ।
विशेषज्ञहरूका अनुसार हालैका दिनमा पहाडी क्षेत्रमा भएको लगातार वर्षाले सप्तकोशीमा जलसतह बढ्न थालेको हो । यसले तल्लो तटीय क्षेत्रका बासिन्दामा सतर्कता अपनाउन आवश्यक देखिएको छ ।
