शिलादीप खबर न्युजडेस्क,
असोज १ गते, बुधबार ।
कन्या संक्रान्तिको अवसरमा आज कालिगढ, प्राविधिक तथा मजदुर समुदायले ‘विश्वकर्मा पूजा’ र ‘वास्तु दिवस’ देशभर श्रद्धा र उत्साहका साथ मनाइरहेका छन् ।
यस दिन विभिन्न उद्योग–धन्दा, कारखाना र निर्माण स्थलमा भगवान् विश्वकर्माको बालुवामूर्त्ति वा तस्वीर स्थापना गरी पूजाआर्चना गर्ने परम्परा रहेको छ । उद्योग र कलकारखानाहरूलाई विशेष रूपमा सजाइन्छ भने कामदार र मजदुरहरूलाई समेत सहभागी गराई सामूहिक रूपमा पूजा सम्पन्न गरिन्छ ।
पूजापछि बालुवा वा अन्य वस्तुबाट बनाइएका मूर्तिहरूलाई वाग्मतीको मुहानस्थल सुन्दरीजलसहितका पवित्र नदी वा जलाशयमा विसर्जन गर्ने प्रचलन छ ।
कालिगढहरूले आफ्ना उपकरण र औजारहरूको पनि विशेष पूजा गर्ने चलन छ । यसरी पूजा गरेपछि ती औजार लामो समयसम्म टिक्ने, बिग्रन नदिने र राम्रो काम हुने विश्वास गरिन्छ ।
धार्मिक ग्रन्थअनुसार द्वापर युगमा भगवान् कृष्णलाई दैत्यहरूको आक्रमणबाट सुरक्षित गर्न विश्वकर्माले समुद्रबीच ‘भेद द्वारका’ नामक नगरी निर्माण गरेका थिए भन्ने जनविश्वास छ । यही कारणले विश्वकर्मालाई ‘देवशिल्पी’ अर्थात् सृष्टिकर्ता इन्जिनियरका रूपमा पूजिन्छ ।
