शिलादीप अनलाईन खबर,
असोज २२, रौतहट ।
कटहरिया नगरपालिकाका मेयर अजय प्रकाश जयसवालले आफू कर्मचारीहरूको तलब भत्ता निकासा गर्न पूर्ण रूपमा तयार हुँदाहुँदै पनि केही वडा अध्यक्षहरूले बिना कारण वडा कार्यालयमा तालाबन्दी गरेर जनसेवामा अवरोध पुर्याएको आरोप लगाएका छन्।
बुधबार आफ्नै निवासमा सञ्चारकर्मीहरूसँग कुरा गर्दै मेयर जयसवालले नगरपालिकामा कार्यरत स्थायी, अस्थायी, करार तथा ज्यालादारी सबै प्रकारका कर्मचारीको बाँकी तलब भुक्तानी गर्न आफू तयार रहेको स्पष्ट पारे। उनले भने, “तलबका लागि आवश्यक रकम रेडबुकमा नै छुट्याइसकिएको छ, तर वडा अध्यक्षहरूले विवरण नदिँदा ढिलाइ भइरहेको हो।”
उनका अनुसार नगरपालिकाले सबै वडालाई कर्मचारीहरूको हाजिरी रजिस्टर, नियुक्तिपत्र, करार सम्झौता र अन्य आवश्यक कागजातहरू पालिकामा पठाउन पटक–पटक पत्राचार गरिसकेको छ। “कसले कति समय काम गर्यो भन्ने विवरण नआउँदा तलब भुक्तानीमा समस्या भएको हो,” मेयर जयसवालले स्पष्ट पारे।
तर, केही वडा अध्यक्षहरूले कर्मचारीको तलब रोकिएको भ्रम फैलाउँदै मेयरविरुद्ध गलत प्रचार गर्दै वडा कार्यालयमै ताल्चा लगाएको उनको आरोप छ। “जनतालाई सेवाबाट वञ्चित गरी राजनीतिक स्वार्थपूर्तिका लागि तालाबन्दी गर्नु जनताको अपमान हो,” उनले भने।
मेयर जयसवालले पालिकाभित्र रहेका अस्थायी, करार र ज्यालादारी कर्मचारीहरूको तलब भुक्तानी गरेर त्यसपछि दरबन्दी बाहेकका सबै नियुक्ति र करार समाप्त गर्ने केन्द्रीय सरकारको परिपत्रअनुसारको नीति कार्यान्वयन गर्ने प्रतिबद्धता जनाए।
उनले भने, “तलब वितरणमा ढिलाइ हुनुको मुख्य कारण वडा कार्यालयबाट आवश्यक अभिलेख नआउनु हो। वडा अध्यक्षहरूले ताल्चा खोलेर विवरण पठाए भने तलब तुरुन्त निकासा हुन्छ।”
यससँगै उनले हालै आएको बाढी र चट्याङबाट प्रभावित किसान र परिवारको सहयोगका लागि पनि पालिका सक्रिय रहेको जानकारी दिए। उनका अनुसार असोज १८ गतेको चट्याङ घटनामा मृत्यु भएका हथियाहीका दुई किशोरका परिवारलाई राहत उपलब्ध गराउन पहल भइरहेको छ भने बाढीले नोक्सानी पुर्याएका धानबालीको क्षति विवरण संकलनका लागि सबै वडालाई निर्देशन दिइसकिएको छ।
मेयर जयसवालले अन्त्यमा भने, “म जनताको सेवा र कर्मचारीको हकहित सुनिश्चित गर्न प्रतिबद्ध छु। वडा कार्यालयमा तालाबन्दी गरेर समस्या समाधान हुँदैन—संवाद र सहकार्यबाटै पालिका अघि बढ्छ।”
