शिलादीप खबर न्युज डेस्क ,
असोज ०८ गते ,बुधबार ।
दसैँको अवसरमा मनाइने नवरात्रको तेस्रो दिन आज चन्द्रघण्टा देवीको पूजा आराधना भइरहेको छ। नवरात्र आरम्भसँगै नौ देवीहरूको क्रमिक रुपमा पूजा गर्ने परम्परा रहेको छ।
आश्विन शुक्ल प्रतिपदादेखि सुरु हुने दसैँ पर्वमा पहिलो दिन शैलपुत्री, दोस्रो दिन ब्रह्मचारिणी र तेस्रो दिन चन्द्रघण्टा देवीको पूजा गरिन्छ। त्यसपछि क्रमशः कुष्माण्डा, स्कन्दमाता, कात्यायनी, कालरात्रि, महागौरी र सिद्धिदात्रीको आराधना गर्ने प्रचलन छ।
तेस्रो दिनको पूजा विधि घटस्थापनाको दिनझैं नै हुने परम्परा छ। बिहानै आत्मशुद्धि गरेर घटस्थापनामा राखिएको जमरामा नदी, खोलाबाट ल्याइएको पवित्र जलले सिंचन गर्ने चलन छ। यस दिन जलपूर्ण कलशमा पञ्चपल्लव अर्पण गरी देवी चन्द्रघण्टा सहित महाकाली, महालक्ष्मी र महासरस्वतीको पूजा गरिन्छ।
नवरात्रका नौ दिनसम्म दुर्गा सप्तशती, श्रीमद्देवी भागवत र अन्य देवी स्तोत्रको पाठसहित विशेष पूजा आयोजना गरिन्छ। भक्तजनहरू शक्ति, ऐश्वर्य र विद्या प्राप्त हुने विश्वाससहित देवीको आराधनामा सहभागी हुन्छन्।
नवरात्रको पूजाआर्चना आश्विन शुक्ल नवमीसम्म निरन्तर चल्ने र विजयादशमीका दिनदेखि कोजाग्रत पूर्णिमासम्म प्रसाद ग्रहण गर्ने परम्परा छ।
यसरी करिब १५ दिनसम्म नेपाली समाजमा बडादसैँ पर्व भव्यताका साथ मनाइन्छ।
