शिलादीप खबर न्युजडेस्क ,
असोज ०७ गते, मंगलबार ।
शिक्षामन्त्री महावीर पुनले पदभार सम्हालेपछि मंगलबार मन्त्रालयस्तरीय तीन महत्त्वपूर्ण निर्देशन दिएका छन्।
पहिलो, अब देशभरका सामुदायिक माध्यमिक विद्यालयमा कम्प्युटर शिक्षा अनिवार्य रूपमा सुनिश्चित गर्न प्रत्येक विद्यालयमा कम्तीमा एकजना कम्प्युटर शिक्षक दरबन्दी थपिने व्यवस्था गर्नुपर्ने उनले बताए।
दोस्रो, विश्वविद्यालयहरूले परीक्षा लिएर नतिजा प्रकाशन गर्न अत्यधिक समय लगाउने प्रथामाथि उनले आपत्ति जनाउँदै बढीमा ३ महिनाभित्र परीक्षाफल सार्वजनिक गर्न निर्देशन दिएका छन्। तोकिएको समयमा नतिजा ननिकाले अनुदानसमेत रोक्का गरिने चेतावनी उनले दिएका छन्। “राष्ट्रिय परीक्षा बोर्डले १२ कक्षाका ५ लाख विद्यार्थीको नतिजा तीन महिनाभित्र निकाल्छ भने विश्वविद्यालयले किन सक्दैन ?” मन्त्री पुनको प्रश्न छ।
तेस्रो, त्रिभुवन विश्वविद्यालय, कीर्तिपुर परिसरको फोहर र झाडी हटाएर आकर्षक बनाउनुपर्ने उनले बताएका छन्। ठूला रुख नकटाई सफाइ गरी सुन्दर बगैँचासहित फुटपाथ निर्माण गर्नुपर्ने उनको भनाइ छ।
सामाजिक सञ्जालमार्फत मन्त्री पुनले भनेका छन्, “आज मन्त्रालयमा मैले तुरुन्तै काम अघि बढाउन निर्देशन दिएको तीन सानातिना तर महत्वपूर्ण कदमहरू यिनै हुन्।”
