शिलादीप खबर डेस्क ,
भदौ १६ गते, सोमबार ।
उत्तर प्रदेश, भारत — विद्यालयलाई शिक्षा र संस्कारको मन्दिर भनिन्छ, तर अलीगढस्थित एक सरकारी विद्यालयका प्रिन्सिपलले आफ्नै मर्यादालाई ख्याल नगरी विद्यार्थीलाई नै ‘लभ लेटर’ पठाएको घटनाले सबैलाई स्तब्ध पारेको छ ।
जवाँ ब्लकअन्तर्गतको गाउँमा रहेको सो विद्यालयका प्रिन्सिपल शकिल अहमदले सातौँ कक्षामा पढ्ने एक छात्रालाई बारम्बार प्रेमपत्र पठाउँदै आफूसँग बिहे गर्न दवाब दिएको खुलासा भएको हो ।
बालिकाले घरमा सारा घटना सुनाएपछि परिवारले तत्काल प्रहरीमा उजुरी दिएको र त्यसपछि प्रिन्सिपल अहमदलाई पक्राउ गरिएको भारतीय सञ्चारमाध्यमहरूले जनाएका छन् ।
प्रेमपत्रमा उनले “म तिमीलाई धेरै मन पराउँछु, तिमीलाई आफ्नो पत्नी बनाउन चाहन्छु” भन्ने खालका अशोभनीय शब्द प्रयोग गरेको उल्लेख गरिएको छ ।
घटनाबारे जानकारी पाएलगत्तै स्थानीयबासी र पीडित परिवार आक्रोशित बनेका छन् । हाल आरोपी प्रिन्सिपललाई हिरासतमा राखी अनुसन्धान भइरहेको प्रहरीको भनाइ छ ।
