प्रदीप कुमार दास, रौतहट
फाल्गुन १२, मंगलबार
रौतहट क्षेत्र नं. ४ मा फाल्गुन २१ गते निर्धारित प्रतिनिधिसभा निर्वाचनको मिति नजिकिँदै जाँदा चुनावी गतिविधि तीव्र बन्दै गएको छ। यसैक्रममा रामकुमार भट्टराई नेतृत्वमा अघि बढिरहेको घरदैलो अभियानले चन्द्रपुर नगरपालिका–७ मा उल्लेखनीय जनसहभागिता जुटाएको छ।
चन्द्रपुर नगरपालिका–७ अन्तर्गत पर्ने नयाँबस्ती, कटानी, बनबहुवरी र बसन्तपुर क्षेत्रमा मंगलबार सम्पन्न घरदैलो कार्यक्रममा स्थानीयवासीको उत्साहपूर्ण उपस्थिति देखिएको थियो। उम्मेदवार भट्टराईले टोल–टोलमा पुगेर मतदातासँग प्रत्यक्ष संवाद गर्नुभएको थियो। सो अवसरमा स्थानीय बासिन्दाले टीका, माला तथा दोसाला ओढाएर स्वागत गर्दै शुभकामना व्यक्त गरेका थिए।
विशेषगरी युवा र महिला मतदाताको सक्रिय सहभागिता यसपटकको अभियानको मुख्य आकर्षण बनेको आयोजक पक्षको भनाइ छ। घरदैलोका क्रममा स्थानीयले पूर्वाधार विकास, रोजगारीको अवसर, गुणस्तरीय शिक्षा, सुरक्षित खानेपानी र सहज स्वास्थ्य सेवाको पहुँच विस्तारजस्ता विषयमा आफ्ना अपेक्षा तथा सुझाव राखेका थिए।
निर्वाचन आचारसंहिताको पूर्ण पालना गर्दै प्रचार–प्रसारलाई व्यवस्थित रूपमा अघि बढाइएको बताइएको छ। उम्मेदवार भट्टराईले सुशासन, पारदर्शिता र दीर्घकालीन विकासको आधार निर्माण आफ्नो प्राथमिकतामा रहेको उल्लेख गर्दै “तारा” चुनाव चिन्हमा मतदान गर्न मतदातासँग आग्रह गर्नुभयो।
कार्यक्रममा पूर्व सांसद देवेन्द्र पटेल, मधेश प्रदेशका पूर्व मन्त्री समीर भट्टराई, नगर प्रमुख विनोद प्रसाद कुर्मी, विभिन्न वडाका वडाध्यक्ष तथा स्थानीय तहका नेता–कार्यकर्ताको उपस्थिति रहेको थियो।
राजनीतिक विश्लेषकहरूका अनुसार क्षेत्र नं. ४ मा बढ्दो घरदैलो गतिविधि र जनसहभागिताले निर्वाचनलाई प्रतिस्पर्धात्मक बनाउने संकेत देखिएको छ। चुनावी अभियानका बाँकी दिनहरूमा मतदाता भेटघाट र अन्तरक्रियालाई थप तीव्र बनाइने जानकारी अभियान टोलीले दिएको छ।
