प्रदीप सम्राट, रौतहट ।
कार्तिक १९ गते , बुधबार ।
रौतहट जिल्लाको दुर्गा भगवती गाउँपालिका–२ भलोहियामा अवस्थित सरस्वती प्राथमिक विद्यालयको नयाँ भवनको एक भव्य समारोहका बीच उद्घाटन गरिएको छ । विद्यालयको नव–निर्मित भवनको उद्घाटन गाउँपालिकाका अध्यक्ष शम्भू सिंहले प्रमुख आतिथ्यतामा सम्पन्न गर्नुभयो ।
उद्घाटन समारोहमा गाउँपालिकाका उपाध्यक्ष ,प्रमुख प्रशासकीय अधिकृत नवीन श्रीवास्तव, कार्यपालिका सदस्य बिना महतो, विद्यालयका प्रमुख नरेन्द्र पाण्डे, पूर्व प्रमुख लिलाधर झा, समाजसेवी वीरेन्द्र पाण्डे, साथै स्थानीय बुद्धिजीवी वर्ग, अभिभावकवर्ग, शिक्षक–शिक्षिका र राजनीतिक दलका प्रतिनिधिहरूको उल्लेखनीय उपस्थिति रहेको थियो ।
कार्यक्रमका प्रमुख अतिथि अध्यक्ष सिंहले विद्यालय भवनको उद्घाटन गर्दै शिक्षाको गुणस्तर सुधार र भौतिक पूर्वाधार सुदृढीकरणमा गाउँपालिकाको निरन्तर प्रतिबद्धता रहने बताउनुभयो । उहाँले स्थानीय तहको सक्रियतामा निर्माण भएको यो भवनले विद्यालयका विद्यार्थीहरूलाई सहज र शैक्षिक वातावरणयुक्त अध्ययनमा सहयोग पुर्याउने विश्वास पनि व्यक्त गर्नुभयो ।
कार्यक्रमका अन्य वक्ताहरूले पनि गाउँको शैक्षिक विकासमा यो भवनले नयाँ आयाम थप्ने उल्लेख गर्दै सबै पक्षलाई सहयोग र एकता कायम गर्न आह्वान गरे ।
सांस्कृतिक प्रस्तुति र विद्यार्थीहरूको स्वागत कार्यक्रमसहित सम्पन्न उक्त उद्घाटन समारोह उत्साहपूर्ण वातावरणमा सुसम्पन्न भएको विद्यालय स्रोतले जानकारी दिएको छ ।
