शिलादीप अनलाईन खबर,
कार्तिक ७ गते , शुक्रबार ।
रौतहट जिल्लाभर छठ पर्वको तयारीले नयाँ रौनक पाएको छ। सूर्य भगवानको उपासना गर्ने यो महान् लोकपर्व नजिकिँदै जाँदा यहाँका गाउँ–सहर छठ गीत र धुनले गुन्जिरहेका छन्। बजारका पसलदेखि घर आँगन र सार्वजनिक स्थलसम्म लाउडस्पिकरमार्फत मैथिली र भोजपुरी भाषाका भक्ति गीतहरू घन्किरहेका छन्, जसले सम्पूर्ण वातावरणलाई भक्तिमय बनाइदिएको छ।
छठ पर्व नजिकिँदै गर्दा रौतहटका बागमती, लालबकैया, चादी खोला , डोरा खोला लगायतका प्रमुख नदीहरू तथा जिल्लाभरका पोखरी, ताल र अन्य जलाशयहरूमा श्रद्धालुहरू घाट निर्माण, सरसफाइ र सजावटमा व्यस्त देखिन्छन्। स्थानीयवासी, युवाहरू र धार्मिक समूहहरू मिलेर जलाशय वरपरको फोहोर हटाउँदै नयाँ घाट निर्माण र बाँस, कपडा, ध्वजापताका र रङ्गीचङ्गी बत्तीहरूले सजाउने कार्य तीव्र गतिमा भइरहेको छ।
हर्षाहाका एक कर्मठ समाजसेवी एवं नेकपा एस पार्टीका जिल्ला सदस्य युवा नेता धर्मेन्द्र पटेलका अनुसार जिल्लाका १८ वटै स्थानीय तहहरूमा छठ पर्वका लागि विशेष तयारी गरिएको छ। “पूजास्थलहरू सुरक्षित र आकर्षक बनाउन युवाहरुद्वारा धमाधम काम भइरहेको छ,” पटेलले भने, “छठमा लाखौँ भक्तजनहरूको आगमन हुने भएकाले सुरक्षाकर्मी, जनप्रतिनिधि र स्थानीय स्वयंसेवकहरू सक्रिय रूपमा संलग्न भएका छन्।”
महान आस्थाका महापर्व छठ पर्व चार दिनसम्म श्रद्धा र उत्साहका साथ मनाइनेछ। पहिलो दिन ‘नहाय–खाय’ बाट प्रारम्भ हुने यो पर्व दोस्रो दिन ‘खरना’, तेस्रो दिन अस्ताउँदो सूर्यलाई अर्घ्य र अन्तिम दिन बिहान उदाउँदो सूर्यलाई अर्घ्य दिई सम्पन्न गरिनेछ। सोमबार साँझ अस्ताउँदो सूर्यलाई अर्घ्य दिने तयारी भइरहेको छ भने मंगलबार बिहान उदाउँदो सूर्यलाई अर्घ्य दिई पूजाको समापन गरिनेछ।
पर्व नजिकिँदै गर्दा रौतहटका बजारहरूमा चकाचक, ठेकुआ, नारिवल, गहुँ, केरा, सखर, माटाका भाँडाकुँडालगायतका सामग्री किन्नेको भीड बढेको छ। महिला श्रद्धालुहरू छठ गीत गाउँदै सखर र गहुँ पिस्ने, नयाँ बास्केट (डाला) बुन्ने र पूजाका सामग्रीहरू तयार पार्नमा व्यस्त देखिन्छन्।
छठ पर्व केवल धार्मिक मात्र होइन, सामाजिक एकता र सहअस्तित्वको प्रतीकका रूपमा पनि मनाइन्छ। गाउँका सबै जात, धर्म र समुदायका मानिसहरूले एकै ठाउँमा जुटी नदी किनारमा पूजा अर्चना गर्ने परम्परा छ। यसले रौतहटको सामाजिक सद्भाव र धार्मिक सहिष्णुताको झल्को दिन्छ।
स्थानीय प्रशासनले पनि छठ पर्वलाई शान्तिपूर्ण र व्यवस्थित बनाउनका लागि विशेष योजना तयार गरेको जनाएको छ। सुरक्षाकर्मीहरूलाई संवेदनशील स्थानहरूमा परिचालन गरिएको छ भने विद्युत् र स्वास्थ्य सेवाका टोलीहरू पनि तयारी अवस्थामा राखिएका छन्।
रौतहटको हरेक गाउँ र सहर अहिले छठमय बन्दै गएको छ — जहाँ प्रत्येक घरमा सूर्य भगवानको आराधनाको तयारी, घाटमा सरसफाइको उत्साह र गीत–संगीतको लयमा रमाइरहेका श्रद्धालुहरू देख्न सकिन्छ। यो पर्वले रौतहटमा फेरि एकपटक धार्मिक उल्लास र सामूहिक एकताको झल्को ल्याएको छ।
