सुनसरी ,
वैशाख ८ गते ।
सुनसरीको भोक्राहा नरसिंह गाउँपालिका–८ मा मानवता नै स्तब्ध बनाउने घटना सार्वजनिक भएको छ। ५५ वर्षीय उमर मियाँले आफ्नै ३० वर्षीय छोरा सदरुल मियाँलाई भारतीय अपहरणकारीको समूहलाई सुम्पिएको खुलासा भएको हो।
प्रहरीका अनुसार, तरकारी किनेर फर्किने क्रममा उमरले सुरसान पुल नजिकै छोरालाई पूर्वतयारीमा बसेका अपहरणकारीको जिम्मा लगाएका थिए। अपहरणकारीहरूले सदरुललाई बाँधेर बोरामा हालेर भारततर्फ लैजाँदै गर्दा एक प्रत्यक्षदर्शीको सूचनाका आधारमा भारतीय प्रहरीले गाडी रोकी उद्धार गरेको थियो।
भारतको बिहारस्थित सुपौल जिल्लाको प्रहरीको सक्रियताले सदरुलको ज्यान जोगिएको हो। घटनापछि जिल्ला प्रहरी कार्यालय सुनसरीले बाबुसहित आमा र अर्का एक जनालाई नियन्त्रणमा लिएर थप अनुसन्धान अघि बढाएको जनाएको छ।
घटनाको कारणबारे खुल्न बाँकी रहे पनि प्रहरीले यसलाई गम्भीरतापूर्वक अनुसन्धान गरिरहेको छ।
